Hadeeth Cards
Da'wa cards that highlight great meanings from the noble prophetic hadiths in a simple style and attractive display that helps the Muslim to have a deeper understanding of his religion in an easy way
All
అబూ హురైరాహ్ (రదియల్లాహు అన్హు) ఉల్లేఖన: “రసూలుల్లాహ్ (సల్లల్లాహు అలైహి వసల్లం) ఇలా పలుకగా నేను విన్నాను: “చూడండి, నిశ్చయంగా ఈ ప్రపంచం శపించబడింది, మరియు దానిలో ఉన్న ప్రతిదీ కూడా; కేవలం అల్లాహ్ స్మరణ, మరియు దానికి అనుగుణంగా ఉన్నది; ఒక పండితుడు మరియు ఙ్ఞానసముపార్జన చేయు వాడు (విద్యార్థి) తప్ప.”
అత్తిర్మిదీ మరియు ఇబ్నె మాజహ్ నమోదు చేసినారు:
ఈ హదీథులో ప్రవక్త (సల్లల్లాహు అలైహి వసల్లం) ఇలా తెలియజేస్తున్నారు: “ఈ ప్రపంచాన్ని మరియు దానిలోని ప్రతిదానిని అల్లాహ్ అసహ్యించుకుంటాడు; నిందార్హమైనదిగా భావిస్తాడు; విడిచి పెట్టదగినదిగా, దూరంగా ఉంచదగినదిగా భావిస్తాడు; అందులో ఉన్న ప్రతిదీ విడిచి పెట్టదగినది మరియు ఎంతమాత్రమూ ప్రసంసార్హమైనది కాదు. ఎందుకంటే ప్రపంచం మరియు దానిలోని ప్రతిదీ సర్వశక్తిమంతుడైన అల్లాహ్ నుండి దృష్టి మరల్చి, ఆయన నుండి దూరం చేస్తుంది; అయితే అల్లాహ్ స్మరణ మరియు దానికి అనుగుణంగా ఉండే మరియు దానిని పోలి ఉండే, మరియు అల్లాహ్ ఇష్టపడేవి లేదా ప్రజలకు బోధించే మతపరమైన జ్ఞానంలో ప్రావీణ్యం ఉన్న పండితుడు, లేదా అలాంటి జ్ఞానాన్ని కోరుకునే జ్ఞాన అన్వేషకుడు తప్ప.
వహ్’షియ్యిబ్ని హర్బ్ రదియల్లాహు అన్హు ఉల్లేఖన: వారు ఇలా అన్నారు: “ఓ రసూలుల్లాహ్ సల్లల్లాహు అలైహి వసల్లం! మేము తింటున్నాము కానీ కడుపు నిండినట్లు ఉండడం లేదు.” ఆయన సల్లల్లాహు అలైహి వసల్లం ఇలా అన్నారు: “బహుశా మీరు విడివిడిగా తింటున్నారు కావచ్చు?” దానికి వారు: “అవును” అన్నారు. అపుడు ఆయన ఇలా అన్నారు:“కలిసి భోజనం చేయండి, ఆహారంపై అల్లాహ్ నామాన్ని స్మరించండి, అందులో మీకు శుభం కలుగుతుంది.”
అబూదావూద్, ఇబ్న్ మాజహ్ మరియు అహ్మద్ నమోదు చేసినారు:
కొంతమంది సహాబాలు ప్రవక్త సల్లల్లాహు అలైహి వసల్లంతో: “ఓ ప్రవక్తా! సల్లల్లాహు అలైహి వసల్లం. మేము తింటున్నాము కానీ ఎప్పుడూ కడుపు నిండినట్లు అనిపించటం లేదు” అన్నారు. ప్రవక్త (సల్లల్లాహు అలైహి వసల్లం) వారితో ఇలా అన్నారు: “బహుశా మీరు విడివిడిగా తింటున్నారేమో, ఎవరికి వారు ఒంటరిగా తింటున్నారేమో.” దానికి వారు: “అవును” అన్నారు. అపుడు ప్రవక్త సల్లల్లాహు అలైహి వసల్లం “విడివిడిగా, ఒంటరిగా కాకుండా, మీరంతా సమిష్ఠిగా ఒకచోట చేరి భోజనం చేయండి. ఆహారంపై “బిస్మిల్లాహ్” (అల్లాహ్ నామమున ప్రారంభిస్తున్నాము) అని అల్లాహ్ పేరును స్మరించండి. ఆ ఆహారం మీ కొరకు దీవించబడి, శుభప్రదం అవుతుంది, మరియు దానితో మీరు సంతుష్ఠులౌతారు” అన్నారు.
అనస్ బిన్ మాలిక్ (రదియల్లాహు అన్హు) ఉల్లేఖన: “రసూలుల్లాహ్ సల్లల్లాహు అలైహి వసల్లం ఇలా పలికినారు: “(ఇస్రా మరియు మేరాజ్ నాటి రాత్రి) నన్ను ఆకాశాలలోనికి తీసుకు వెళ్ళినపుడు (నరకములో) రాగి గోళ్ళను కలిగి ఉండి వాటితో ముఖాలను, చాతీలను చీలికలు అయ్యేలా గీరుకుంటూ ఉన్న వారి గుంపును దాటుకుంటూ వెళ్ళినాను. నేను ఇలా అడిగినాను: “ఓ జిబ్రయీల్! ఎవరు వీళ్ళు?” దానికి ఆయన ఇలా జవాబిచ్చినారు: “వీరు మనుషుల మాంసం తినడంతో సమానమైన చర్యలైన 'ప్రజల వీపు వెనుక (వారి పరోక్షంలో) వారి గురించి చెడుగా మాట్లాడుట, వారిపై అపనిందలు వేయుట' చేసేవారు.”
అబూదావూద్ నమోదు చేసినారు:
ఈ హదీథులో ప్రవక్త సల్లల్లాహు అలైహి వసల్లం ఇలా తెలియజేస్తున్నారు: ఆయన సల్లల్లాహు అలైహి వసల్లం ఇస్రా మరియు మే’రాజ్ యాత్రలో స్వర్గనరకాల దర్శనానికి తీసుకు వెళ్ళబడినపుడు, రాగి గోళ్ళు కలిగి ఉండి వాటితో ముఖాలను, మరియు ఛాతీలను, అవి చీలికలు అయ్యేలా గోక్కుంటూ ఉన్న వ్యక్తులను దాటుకుంటూ వెళ్ళడం జరిగింది. అపుడు ప్రవక్త సల్లల్లాహు అలైహి వసల్లం జిబ్రయీల్ అలైహిస్సలాంను ఇలా అడిగారు: “ఓ జిబ్రయీల్! ఏమి చేసినందుకు వీరు ఈ శిక్షకు అర్హులైనారు?” జిబ్రీల్ అలైహిస్సలాం) ఇలా జవాబిచ్చారు: “వీరు ప్రజల గురించి వారి వీపు వెనుక చెడుగా మాట్లాడేవారు, వారిపై అపనిందలు మోపేవారు మరియు వారి గౌరవానికి భంగం కలిగించేవారు.”
అబూ మూసా రదియల్లాహు అన్హు ఉల్లేఖన: “ప్రవక్త సల్లల్లాహు అలైహి వసల్లం ఇలా పలికినారు: "అల్లాహ్ నాకు ఇచ్చి పంపిన మార్గదర్శకత్వం మరియు జ్ఞానం యొక్క ఉదాహరణ భూమిపై సమృద్ధిగా కురిసే వర్షం లాంటిది, అందులో కొంత భాగం సారవంతమైన నేల, అది వర్షపు నీటిని పీల్చుకుని సమృద్ధిగా వృక్షసంపదను మరియు గడ్డిని ఉత్పత్తి చేస్తుంది. అందులోని మరొక భాగం గట్టిగా ఉండే బంజరు భూమిలాంటిది అది వర్షపు నీటిని నిలుపుకుంటుంది. దాని ద్వారా ప్రజలు తమ దాహార్తిని తీర్చుకున్నారు, తమ పొలాలకు నీరు పెట్టుకున్నారు, మొక్కలను పెంచుకున్నారు; అలా ప్రజలకు అల్లాహ్ ప్రయోజనాన్ని చేకూర్చుతాడు. మరియు అందులో మరొక భాగము సమతలంగా ఉన్న మైదానం వంటిది. అది నీటిని నిలుపుకోలేదు మరియు వృక్ష సంపదను ఉత్పత్తి చేయలేదు. అటువంటి భూమి ఎటువంటి ప్రయోజనాన్నీ ఇవ్వలేదు. మొదటి ఉపమానం అల్లాహ్ యొక్క ధర్మాన్ని అర్థం చేసుకుని, అల్లాహ్ నా ద్వారా అవతరింపజేసిన ఙ్ఞానము నుండి ప్రయోజనం పొంది, నేర్చుకుని ఇతరులకు బోధించే వ్యక్తి ఉదాహరణ వంటిది. చివరి ఉపమానం ఏమిటంటే, దానిని గురించి పట్టించుకోని వ్యక్తి మరియు నా ద్వారా అల్లాహ్ పంపిన మార్గదర్శకత్వాన్ని తీసుకోని వ్యక్తి .”
అల్ బుఖారీ మరియు ముస్లిం నమోదు చేసినారు
ప్రవక్త సల్లల్లాహు అలైహి వసల్లం ఆశ్చర్యంతో ఇలా వివరించారు: తాను తీసుకొచ్చిన మార్గదర్శకం మరియు కోరిన లక్ష్యానికి చేర్చే మార్గం, మరియు షరియా జ్ఞానం నుండి ప్రయోజనం పొందే వ్యక్తిని, ఎక్కువ వర్షం పడే భూమితో పోల్చారు; అది మూడు రకాలుగా విభజించబడింది: మొదటిది: వర్షపు నీటిని స్వీకరించే స్వచ్ఛమైన, సారవంతమైన భూమి, తరిభూమి మరియు పొడిభూమి (మెరక) రెండింటిలోనూ సమృద్ధిగా మొక్కలను ఉత్పత్తి చేస్తుంది, ప్రజలకు ప్రయోజనం చేకూరుస్తుంది. రెండవది: నీటిని నిలుపుకునే భూమి కానీ ఇందులో పంటలు పండవు, వృక్షసంపద పెరగదు. ప్రజలు ప్రయోజనం పొందేందుకు ఇది నీటిని నిలుపుకుంటుంది, ప్రజలు ప్రయోజనం పొందేందుకు వీలు కల్పిస్తుంది. కాబట్టి వారు తమ పశువులకు నీరు త్రాపుతారు మరియు పంటలకు నీరు పెడతారు. మరియు మూడవ రకం: ఇది నున్నగా, చదునుగా ఉండే నేల. ఇది నీటిని నిలుపుకోదు లేదా ఎటువంటి వృక్షసంపదను పెంచదు. ఇది వర్షపు నీటితో తనకు తానుగా ప్రయోజనం పొందదు, లేదా ఇతరులకు కూడా ప్రయోజనం కలిగించదు. ప్రజల కొరకు ప్రవక్త సల్లల్లాహు అలైహి వ సల్లం ఏ జ్ఞానము మరియు మార్గదర్శకత్వముతో పంపబడినారో దానిని వినే వారికి కూడా ఇది వర్తిస్తుంది. మొదటి రకం: ధర్మపండితుడు: ఇతడు అల్లాహ్ యొక్క ధర్మాన్ని అర్థం చేసుకుని, తాను ఆర్జించిన జ్ఞానం ప్రకారం నడుచుకుని, ఇతరులకు ఆ ఙ్ఞానాన్ని బోధిస్తాడు. అతను నీటిని పీల్చుకుని, తనకు తానుగా ప్రయోజనం చేకూర్చుకుని, తోటల పెరుగుదలకు కారణమై, తద్వారా ఇతరులకు ప్రయోజనం చేకూర్చే సారవంతమైన భూమి లాంటివాడు. రెండవ రకం: ఇతడు జ్ఞానాన్ని కంఠస్థం చేసుకుని, భద్రపరిచేవాడు. కానీ ఆ ఙ్ఞానం పట్ల లోతైన అవగాహన లేదా తద్వారా ధార్మిక నియమాలను రూపొందించే సామర్థ్యం లేనివాడు. అతను జ్ఞానాన్ని సేకరిస్తాడు, దాని కోసం తన సమయాన్ని వెచ్చిస్తాడు, కానీ ధర్మం అతడిని ఆచరించమని బోధించే స్వచ్చంద సత్కార్యాలను ఆచరించడు లేదా అతను సేకరించిన ఙ్ఞానాన్ని అర్థం చేసుకోడు. అతను ఇతరులకు ప్రయోజనం చేకూర్చే సాధనం లాంటివాడు - వారికి ప్రయోజనం చేకూర్చేవాడు. నీటిని నిల్వ ఉంచుకుని ప్రజలకు ప్రయోజనం చేకూర్చే భూమి లాంటి వాడు. మూడవ రకం: జ్ఞానాన్ని విని దానిని నిలిపి ఉంచుకోని వాడు, దాని ప్రకారం ప్రవర్తించని వాడు, ఆచరించని వాడు, దానిని ఇతరులకు అందించని వాడు. అతను వృక్షసంపద పెరగని, నీటిని పీల్చుకోని లేదా ఇతరులు దాని నుండి ప్రయోజనం పొందనివ్వని బంజరు లేదా చదునైన, నున్నని మైదాన భూమి లాంటివాడు.
అన్’ను’మాన్ ఇబ్న్ బషీర్ రదియల్లాహు అన్హు ఉల్లేఖన: “చెప్పండి, మీరు కోరుకున్నంత ఆహారం మరియు పానీయాలతో మీరు సుఖంగా జీవించడం లేదా? నేను మీ ప్రవక్త సల్లల్లాహు అలైహి వ సల్లంను చూశాను, ఆయన వద్ద (ఇంటిలో) కడుపు నింపుకోవడానికి తక్కువ నాణ్యత గల ఖర్జూరం కూడా దొరకలేదు.
ముస్లిం నమోదు చేసినారు:
ఇందులో అన్-నుమాన్ ఇబ్న్ బషీర్ రదియల్లాహు అన్హు ప్రజలకు వారి ఆశీర్వాదాలను గుర్తుచేస్తున్నారు; వారు కోరుకున్నంత ఎక్కువ ఆహారం మరియు పానీయాలను భుజిస్తూ ఉన్నారు. తరువాత ఆయన, ప్రవక్త సల్లల్లాహు అలైహి వసల్లం స్థితిని, ఆకలి కారణంగా ఆయన సల్లల్లాహు అలైహి వసల్లం కడుపు నింపుకోవడానికి – నాణ్యమైన ఖర్జూరాల మాట అటుంచి – కనీసం నాణ్యతలేని ఖర్జూరం కూడా ఆయనకు దొరకలేదు అని వివరిస్తున్నారు.
అబుల్ అబ్బాస్ సహల్ బిన్ సఅద్ అస్-సాయిదీ రదియల్లాహు అన్హు నుండి ఉల్లేఖించబడినది, అతను ఇలా అన్నారు: "ఒక వ్యక్తి ప్రవక్త సల్లల్లాహు అలైహి వసల్లం వద్దకు వచ్చి, ఇలా అన్నాడు: 'ఓ అల్లాహ్ యొక్క ప్రవక్తా! నేను ఏ పని చేస్తే అల్లాహ్ నన్ను ప్రేమిస్తాడో మరియు ప్రజలు నన్ను ప్రేమిస్తారో నాకు తెలియజేయండి.' అప్పుడు ఆయన ఇలా అన్నారు: "ఈ లోకం (దునియా) పట్ల వైరాగ్యం వహించు, అల్లాహ్ నిన్ను ప్రేమిస్తాడు. ప్రజల వద్ద ఉన్న వాటి పట్ల వైరాగ్యం వహించు, ప్రజలు నిన్ను ప్రేమిస్తారు."
ఇబ్న్ మాజహ్ మరియు ఇతరులు మంచి సనదులతో నమోదు చేసినారు:
ఒక వ్యక్తి ప్రవక్త సల్లల్లాహు అలైహి వసల్లంను, తాను ఏ పని చేస్తే అల్లాహ్ మరియు ప్రజలు తనను ప్రేమిస్తారో తెలియజేయమని అడిగాడు. అప్పుడు ప్రవక్త సల్లల్లాహు అలైహి వసల్లం అతనితో ఇలా అన్నారు: “నీవు ఈ లోకంలోని మంచిగా కనిపించే వాటిని మరియు పరలోకంలో నీకు ప్రయోజనం లేని వాటిని విడిచిపెడితే, మరియు నీ ధర్మానికి హాని కలిగించే వాటిని విడిచిపెడితే అల్లాహ్ నిన్ను ప్రేమిస్తాడు. అలాగే, ప్రజల చేతుల్లో ఉన్న ఈ లోకపు వస్తువుల పట్ల వైరాగ్యం వహిస్తే ప్రజలు నిన్ను ప్రేమిస్తారు. ఎందుకంటే వారు సహజంగానే వాటిని ప్రేమిస్తారు, మరియు వాటిని వారి నుండి కోరుకునే వారిని ద్వేషిస్తారు, వాటిని వారి కోసం విడిచిపెట్టిన వారిని ప్రేమిస్తారు.”
"అల్-మిఖ్దాం ఇబ్నె మఅ'ది కరిబ్ రదియల్లాహు అన్హు నుండి ఉల్లేఖించబడినది, అతను ఇలా అన్నారు: 'నేను అల్లాహ్ యొక్క ప్రవక్త సల్లల్లాహు అలైహి వసల్లం ఇలా చెబుతూ ఉండగా విన్నాను:'" "మనిషి తన కడుపు కంటే చెడు పాత్రను ఎన్నడూ నింపలేదు. మనిషికి తన వెన్నెముకను నిలబెట్టుకోవడానికి కొన్ని ముద్దలు చాలు. అయితే తప్పనిసరిగా తినవలసి వస్తే, అతని ఆహారం కోసం ఒక వంతు, అతని పానం కోసం ఒక వంతు, మరియు అతని శ్వాస కోసం ఒక వంతు."
ఇమామ్ అహ్మద్, అత్తిర్మిదీ, అన్నసాయీ మరియు ఇబ్న్ మాజహ్ నమోదు చేసినారు:
మన ప్రియమైన ప్రవక్త సల్లల్లాహు అలైహి వసల్లం వైద్యశాస్త్రంలోని ఒక మూల సూత్రం గురించి మనకు మార్గదర్శకత్వం చేశారు, అది 'నివారణ'. ఈ నివారణ ద్వారా ఒక వ్యక్తి తన ఆరోగ్యాన్ని కాపాడుకోగలడు. అది తక్కువగా తినడం. ఒక వ్యక్తి తన ఆకలిని తీర్చుకోవడానికి మరియు తన అవసరమైన పనులను చేయడానికి సరిపడినంత మాత్రమే తినాలి. నిండిన కడుపు కంటే చెడు పాత్ర మరొకటి లేదు, ఎందుకంటే అధికంగా తినడం వల్ల వెంటనే లేదా తర్వాత, కనిపించే లేదా కనిపించని, లెక్కలేనన్ని ఘోరమైన వ్యాధులు వస్తాయి. "ఆ తర్వాత ప్రవక్త (సల్లల్లాహు అలైహి వసల్లం) ఇలా అన్నారు: ఒక వ్యక్తి తప్పనిసరిగా కడుపు నిండా తినవలసి వస్తే, అతను ఆహారం కోసం ఒక వంతు, పానీయం కోసం మరొక వంతు, మరియు తన శ్వాస కోసం ఒక వంతు ఖాళీగా ఉంచాలి, తద్వారా అతనికి ఇబ్బంది మరియు నష్టం జరగకుండా, మరియు అల్లాహ్ తన ధర్మం లేదా ఈ లోకపు విషయాలలో తనపై విధించిన పనులను నిర్వహించడంలో బద్ధకం లేకుండా ఉంటాడు."
అనస్ బిన్ మాలిక్ (రదియల్లాహు అన్హు) ఉల్లేఖన: “రసూలుల్లాహ్ (సల్లల్లాహు అలైహి వసల్లం) కు వారి సహబాలను గురించి ఏదో విషయం అందజేయబడినది, అపుడు ఆయన సల్లల్లాహు అలైహి వసల్లం ఒక ఉపన్యాసం ఇచ్చినారు, అందులో వారు ఇలా పలికినారు: “స్వర్గం మరియు నరకం నాకు ప్రస్తుత పరచబడ్డాయి; ఈ రోజు (నేను చూసిన) శుభాన్ని మరియు కీడును నేను ఎప్పుడూ చూడలేదు. నాకు తెలిసినది (ఏమిటో) ఒకవేళ మీకు తెలిస్తే మీరు తక్కువగా నవ్వేవారు మరియు ఎక్కువగా ఏడ్చేవారు”. అతడు (ఉల్లేఖకుడు) ఇలా అన్నాడు: “రసూలుల్లాహ్ (సల్లల్లాహు అలైహి వసల్లం) సహచరులకు దీనికంటే భారమైన దినము మరొకటి లేదు. వారు తమ తలలు కప్పుకున్నారు మరియు వారి నుండి ఏడుపు శబ్దం వినిపించింది. అప్పుడు ఉమర్ (రదియల్లాహు అన్హు) లేచి నిలబడి ఇలా అన్నారు: “అల్లాహ్ మా ప్రభువుగా, ఇస్లాం మా ‘దీన్’గా (ధర్మముగా - జీవన నియమావళిగా) మరియు ముహమ్మద్ సల్లల్లాహు అలైహి వసల్లం మా ‘ప్రవక్త’గా మేము చాలా సంతృప్తి చెందాము”; ఆ సమయంలో ఒక వ్యక్తి లేచి నిలబడి ఇలా అన్నాడు: ‘నా తండ్రి ఎవరు?’ అప్పుడు ఆయన (ప్రవక్త సల్లల్లాహు అలైహి వసల్లం) ఇలా అన్నారు: “ఫలానా అతడు మీ తండ్రి”; అప్పుడు ఈ ఆయతు అవతరించింది: {“యా అయ్యుహల్లజీన ఆమనూ, లా తస్’అలూ అన్ అష్యాఅ ఇన్ తుబ్’ద లకుం తసూకుమ్....”} [విశ్వాసులారా! ఒకవేళ ఆ విషయాలు మీకు తెలుపబడితే మీకు ఇబ్బంది కలిగించే విషయాలను గురించి అడగకండి...] (సూరహ్ అల్’మాయిదహ్ 5:101)”
అల్ బుఖారీ మరియు ముస్లిం నమోదు చేసినారు
రసూలుల్లాహ్ (సల్లల్లాహు అలైహి వ సల్లం) తన సహచరుల గురించి ఏదో విన్నారు, అంటే వారు ఆయనను చాలా ప్రశ్నలు అడుగుతూ ఉంటారు అని. దానికి ఆయన సల్లల్లాహు అలైహి వసల్లం కలత చెంది ఒక ఉపన్యాసం ఇచ్చారు. అందులో ఆయన సల్లల్లాహు అలైహి వసల్లం ఇలా అన్నారు: నాకు స్వర్గం మరియు నరకం చూపించబడ్డాయి. నేను ఈ రోజు స్వర్గంలో చూసిన దానికంటే ఎక్కువ మంచిని, శుభాన్ని ఎప్పుడూ చూడలేదు, మరియు ఈ రోజు నరకంలో చూసిన దానికంటే ఎక్కువ చెడును, కీడును ఎప్పుడూ చూడలేదు. నేను చూసినది మీరు చూసి ఉంటే, ఈరోజు, అంతకు ముందు రోజు నేను చూసిన దాని నుండి నాకు తెలిసినది మీరు తెలుసుకుని ఉంటే, నిశ్చయంగా మీరు చాలా భయపడి ఉండేవారు, నిశ్చయంగా మీ నవ్వు తక్కువై పోయేది, మరియు మీ ఏడుపు పెరిగి ఉండేది. అనస్ (రదియల్లాహు అన్హు) ఇలా అన్నారు: ఆయన సల్లల్లాహు అలైహి వసల్లం సహచరులకు ఇంత కష్టమైన రోజు మరొకటి లేదు. వారు తమ తలలను కప్పుకుని ఏడువ సాగారు, ఏడుపు తీవ్రత కారణంగా వారి ముక్కుల నుండి శబ్దాలు రాసాగినాయి. ఉమర్ (రదియల్లాహు అన్హు) లేచి నిలబడి ఇలా అన్నారు: మేము అల్లాహ్ను మా ప్రభువుగా, ఇస్లాంను మా ధర్మముగా, ముహమ్మద్ను సల్లల్లాహు అలైహి వసల్లం మా ప్రవక్తగా సంతృప్తి చెందాము. అనస్ (రదియల్లాహు అన్హు) ఇంకా ఇలా అన్నారు: అపుడు ఒకతను నిలబడి ఇలా అన్నాడు: “నా తండ్రి ఎవరు?” ప్రవక్త (సల్లల్లాహు అలైహి వసల్లం) ఇలా అన్నారు: “ఫలానా అతడు నీ తండ్రి”; అపుడు ఈ ఆయతు అవతరించినది. {ఓ విశ్వాసులారా! ఒకవేళ మీకు గనక వివరిస్తే మీకే ఇబ్బంది కలిగించే విషయాలను గురించి అడగకండి...} ” [అల్’మాయిదహ్ 5:101]
అనస్ రదియల్లాహు అన్హు ఉల్లేఖన: “రసూలుల్లాహ్ సల్లల్లాహు అలైహి వసల్లం ఇలా పలికినారు: “ఒకవేళ ఆదము సంతానానికి రెండు లోయల నిండా సంపద ఉన్నా, అతను మూడవ లోయను కోరుకుంటాడు. ఆదము సంతానం యొక్క కడుపును ధూళి (మట్టి) తప్ప మరేమీ నింపదు, మరియు అల్లాహ్ పశ్చాత్తాపపడేవారి పశ్చాత్తాపాన్ని అంగీకరిస్తాడు.”
అల్ బుఖారీ మరియు ముస్లిం నమోదు చేసినారు
ఈ హదీథులో ప్రవక్త సల్లల్లాహు అలైహి వసల్లం ఇలా తెలియజేస్తున్నారు: ఒక మానవుడికి బంగారంతో నిండిన లోయ ఉంటే, అతనిలో సహజంగా ఉండే దురాశ కారణంగా, అతను మరో రెండు లోయలు కావాలని కోరుకుంటాడు. అతను చనిపోయే వరకు మరియు అతని కడుపు అతని సమాధి దుమ్ముతో నిండిపోయే వరకు ఈ ప్రపంచం కోసం దురాశ పడుతూనే ఉంటాడు.
