Hadeeth Cards
Da'wa cards that highlight great meanings from the noble prophetic hadiths in a simple style and attractive display that helps the Muslim to have a deeper understanding of his religion in an easy way
All
Ebu Hurejra (Allahu qoftë i kënaqur me të!) tregon se e ka dëgjuar të Dërguarin e Allahut ﷺ duke thënë: “Namazi me xhemat është njëzet e pesë gradë më i vlefshëm se namazi që falet vetëm. Melekët e natës dhe ditës tubohen gjatë namazit të sabahut.” Pastaj, Ebu Hurejra tha: “Nëse doni, lexojeni ajetin: “... Vërtet, për namaz të sabahut (gjatë leximit të Kuranit) prezantojnë shumë (melekë).” (El Isra, 78)
Muttefek alejhi
Profeti ﷺ në këtë hadith sqaroi se shpërblimi i namazit të një njeriu me xhemat pas imamit është më i mirë se njëzet e pesë namaze që ai i fal vetëm në shtëpinë ose tregun e tij. Pastaj Profeti ﷺ përmendi se melekët e natës dhe të ditës mblidhen në namazin e sabahut. Pastaj Ebu Hurejra (Allahu qoftë i kënaqur me të!), duke sjellë dëshmi për këtë, tha: Lexoni, nëse dëshironi: “... Vërtet, për namaz të sabahut (gjatë leximit të Kuranit) prezantojnë shumë (melekë).” (El Isra, 78) D.m.th. në namazin e sabahut marrin pjesë melekët e natës dhe të ditës.
Abdullah ibn Omeri (Allahu qoftë i kënaqur me të!) ka thënë: "Profeti ﷺ i ka mallkuar ato që ia zgjasin (shtojnë) flokët tjetrës (me flokë të tjerë) dhe ato që kërkojnë t'u zgjaten flokët e tyre, si dhe ato që ua bëjnë tatuazhin tjetrës dhe ato që kërkojnë t'u bëhet tatuazhi."
Muttefek alejhi
Profeti ﷺ është lutur për mallkim, dëbim dhe largim nga mëshira e Allahut të Lartësuar për katër kategori njerëzish: Së pari: Gruaja që vendos zgjatime flokësh për veten ose për një tjetër. Së dyti: Gruaja që kërkon t’i vendosen zgjatime flokësh. Së treti: Ajo që bën tatuazhe, duke shpuar lëkurën me gjilpërë në ndonjë pjesë të trupit, si fytyra, dora ose kraharori, dhe duke futur në të surmë ose substanca të ngjashme, derisa ta lërë një shenjë të kaltër ose të gjelbër, me qëllim zbukurimin dhe hijeshimin. Së katërti: Ajo që kërkon t’i bëhet tatuazh. Këto veprime janë prej mëkateve të mëdha.
Ibn Omeri (Allahu qoftë i kënaqur me të!) transmeton se i Dërguari i Allahut ﷺ ka thënë: “Emrat tuaj më të dashur tek Allahu janë Abdullah dhe Abdurrahman.”
Transmeton Muslimi
Profeti ﷺ në këtë hadith tregoi se emrat më të dashur tek Allahu për djemtë janë: Abdullah dhe Abdurrahman.
Xhabir ibn Abdullahu (Allahu qoftë i kënaqur me të!) tregon se i Dërguari i Allahut ﷺ ka thënë: “Çdo gjë që deh në sasi të madhe, edhe sasia e vogël e saj është e ndaluar.”
Transmetojnë Ebu Davudi, Tirmidhiu, ibn Maxhe dhe Ahmedi
Profeti ﷺ në këtë hadith sqaroi se çdo pije ose ushqim, që shkakton humbjen e kontrollit të aftësive mendore, kur konsumohet në sasi të mëdha, atëherë konsumimi i një sasie të vogël prej tij është i ndaluar, edhe nëse ajo nuk e turbullon mendjen.
Enes ibn Maliku (Allahu qoftë i kënaqur me të!) tregon: “Shkurtimin e mustaqeve, prerjen e thonjve, shkuljen e qimeve të sqetullave dhe rruarjen e qimeve në vendet e turpshme, na është caktuar të mos i vonojmë më shumë se dyzet net."
Transmeton Muslimi
Profeti ﷺ përcaktoi se shkurtimi i mustaqeve të burrit, prerja e thonjve të duarve dhe këmbëve, heqja/shkulja e qimeve të sqetullave dhe rruajtja e qimeve të pjesëve të turpshme nuk duhet të lihen pas dore për më shumë se dyzet ditë.
Umejme bint Rukajka (Allahu qoftë i kënaqur me të!) rrëfen: "Vajta te Profeti ﷺ së bashku me një grup grash nga ensarët për t’i dhënë besën. Ne thamë: "O i Dërguari i Allahut, të japim besën se nuk do t’i shoqërojmë Allahut asgjë, nuk do të vjedhim, nuk do të bëjmë imoralitet, nuk do të gënjejmë, nuk do të shpifim dhe nuk do të të kundërshtojmë në atë që është e drejtë." Profeti ﷺ tha: “Aq sa të keni mundësi dhe të mund ta përballoni.” Ne thamë: "Allahu dhe i Dërguari i Tij janë më të mëshirshëm ndaj nesh. Eja, o i Dërguari i Allahut, të ta japim besën, duke të shtrënguar dorën." Por i Dërguari i Allahut ﷺ tha: “Unë nuk ua shtrëngoj dorën grave. Fjala ime drejtuar njëqind grave është si fjala ime drejtuar një gruaje”, ose tha: “si fjala ime drejtuar një gruaje.”
رواه الترمذي والنسائي وابن ماجه
Umejme bint Rukajka (Allahu qoftë i kënaqur me të!) tregon se së bashku me një grup grash nga ensarët shkuan te Profeti ﷺ për t’i dhënë besën se nuk do t’i shoqërojnë Allahut asgjë, nuk do të vjedhin, nuk do të bëjnë imoralitet, nuk do të gënjejnë dhe nuk do të shpifin dhe nuk do ta kundërshtojnë në atë që është e drejtë. Profeti ﷺ tha: “Aq sa të keni mundësi dhe të mund ta përballoni.” Ne thamë: "Allahu dhe i Dërguari i Tij janë më të mëshirshëm ndaj nesh. Eja, o i Dërguari i Allahut, të të japim besën duke shtrënguar duart siç bëjnë burrat." Profeti ﷺ tha: “Unë nuk i shtrëngoj duart grave; fjala ime dhe besa ime drejtuar njëqind grave është si fjala ime për një grua.”
Ibn Omeri (Allahu qoftë i kënaqur me të!) transmeton se i Dërguari i Allahut ﷺ ka thënë: “Ditën e Kiametit, kur Allahu do t'i tubojë të parët e të fundit, çdo tradhtari do t'i ngrihet një flamur dhe do të thuhet për të: “Kjo është tradhtia e filanit, të birit të filanit!”
Muttefek alejhi
Profeti ﷺ në këtë hadith tregoi se se në Ditën e Kiametit, kur Allahu i Lartësuar do t’i mbledhë të parët dhe të fundit për llogaridhënie, për çdo tradhtar që nuk e ka përmbushur besëlidhjen që ka lidhur, qoftë me Allahun apo me njerëzit, do të ngrihet një shenjë. Kjo shenjë do ta zbulojë tradhtinë e tij dhe atë ditë do të thirret: Kjo është tradhtia e filanit, birit të filanit, për të nxjerrë në pah ligësinë e veprës së tij para njerëzve në vendtubim (të Ditës së Kiametit).
Bera ibn Azibi (Allahu qoftë i kënaqur me të!) ka thënë: “I Dërguari i Allahut ﷺ na ka urdhëruar shtatë gjëra dhe na ka ndaluar shtatë të tjera. Na ka urdhëruar ta vizitojmë të sëmurin, ta përcjellim xhenazen, të lutemi për atë që teshtin, t’ia përmbushim betimin ose kërkesën e atij që na është betuar, t’i dalim në ndihmë të shtypurit, t’i përgjigjemi ftesës dhe ta përhapim selamin. Ndërkaq, na ka ndaluar unazën e arit (ose ka thënë: rrethin e arit), pirjen në enë argjendi, nga shalat dhe shtrojat e mëndafshta, veshjet e mëndafshta, si dhe nga veshja e armaçit, mëndafshit (të zakonshëm), dhe mëndafshit të vrazhdë (istebrak).”
Muttefek alejhi
Profeti ﷺ i urdhëroi muslimanët me shtatë gjëra dhe i ndaloi nga shtatë të tjera: Ato që i urdhëroi janë: së pari, vizita e të sëmurit; së dyti, përcjellja e xhenazes, pjesëmarrja në namazin e të vdekurit, varrosja e tij dhe lutja për të; së treti, lutja për atë që teshtin dhe e falënderon Allahun duke i thënë: “Allahu të mëshiroftë”; së katërti, përmbushja e betimit të atij që betohet dhe besimi i tij, domethënë se nëse dikush betohet për një çështje dhe ti je në gjendje ta bësh atë të jetë e vërtetë, atëherë vepro ashtu; në mënyrë që të mos e detyrosh të shlyejë betimin e tij; së pesti, mbështetja e të shtypurit, duke e ndihmuar dhe duke penguar çdo dëm që i bëhet nga shtypësi, sipas mundësisë; së gjashti, përgjigjja ndaj ftesës për ushqim, si dasma, akika (therja e kafshës pas lindjes së fëmijës) ose raste të tjera të ngjashme; së shtati, dhënia e selamit, përhapja dhe kthimi i tij. Ndërsa ato që i ndaloi janë: së pari, mbajtja e unazave të arit dhe marrja e tij si zbukurim; së dyti, pirja në enë argjendi; së treti, ulja mbi mejathir, që janë shtroja prej mëndafshi që vendosen mbi shalën e kalit ose të devesë; së katërti, veshja e një rrobe prej liri të përzier me mëndafsh, e quajtur “kasij”; së pesti, veshja e mëndafshit; së gjashti, veshja e istabrakut, që është mëndafsh i trashë; dhe së shtati, veshja e dibaxhit, që është lloji më i mirë dhe më i çmuar i mëndafshit.
Aishja, nëna e besimtarëve (Allahu qoftë i kënaqur me të!) tregon: “Hind bint Utbe, gruaja e Ebu Sufjanit, hyri tek i Dërguari i Allahut ﷺ dhe i tha: “O i Dërguari i Allahut! Ebu Sufjani është njeri koprrac, andaj nuk më jep aq sa më mjafton për vete dhe për fëmijët e mi, përveç aq sa marr vetë pa dijen e tij. A kam ndonjë mëkat për këtë? I Dërguari i Allahut ﷺ i tha: “Merr prej pasurisë së tij aq sa është e njohur zakonisht se mjafton për ty dhe fëmijët e tu!”
Muttefek alejhi
Hind bint Utbe (Allahu qoftë i kënaqur me të!) kërkoi këshillën e Profetit ﷺ në lidhje me bashkëshortin e saj, Ebu Sufjanin (Allahu qoftë i kënaqur me të!), i cili ishte njeri koprrac dhe shumë i kujdesshëm për pasurinë e tij. Ai nuk i siguronte asaj dhe fëmijëve të saj aq sa u mjaftonte, përveçse kur ajo merrte fshehurazi nga pasuria e tij pa dijeninë e tij. Ajo e pyeti nëse kishte ndonjë mëkat mbi të për këtë. Profeti ﷺ i tha: "Merr nga pasuria e tij për veten tënde dhe për fëmijët e tu aq sa është e njohur zakonisht se mjafton, edhe pa dijeninë e tij."
