Hadeeth Cards
Da'wa cards that highlight great meanings from the noble prophetic hadiths in a simple style and attractive display that helps the Muslim to have a deeper understanding of his religion in an easy way
All
उम्मुल-मुमिनीन (आस्थावानहरूकि आमा)आइशा (रजियल्लाहु अन्हा) ले बयान गरेकि छिन्, नबी (सल्लल्लाहु अलैहि वसल्लम) जुत्ता लगाउँदा, कपाल कोर्दा, वुजू गर्दा लगायत आफ्ना सबै कार्यहरूमा दायाँबाट आरम्भ गर्न मन पराउनुहुन्थ्यो।
मुत्तफकुन अलैहि
नबी (सल्लल्लाहु अलैहि वसल्लम) सम्मानयोग्य कार्यहरूमा दाहिने तर्फबाट सुरु गर्न रुचाउनुहुन्थ्यो। तीमध्ये केही यस प्रकार छन्: जुत्ता लगाउँदा दाहिने खुट्टाबाट सुरु गर्ने, टाउको र दाह्रीमा तेल लगाउँदा तथा कपाल कोर्दा दायाँबाट सुरु गर्ने, र वुजू गर्दा बायाँ हात र खुट्टाभन्दा पहिले दायाँ हात र खुट्टा धुने इत्यादि।
उम्मुल-मुमिनीन आइशा (रजियल्लाहु अन्हा) ले बयान गरेकि छिन: मैले नबी (सल्लल्लाहु अलैहि वसल्लम) लाई कहिल्यै यति जोडले हाँसेको देखेको छैन, कि उनको घाँटीभित्रको भाग देख्न सकूँ। उहाँ प्रायः मुस्कुराउनु हुन्थ्यो।
मुत्तफकुन अलैहि
आइशा (रजियल्लाहु अन्हा) ले भन्नुभयो नबी (सल्लल्लाहु अलैहि वसल्लम) कहिल्यै पनि यति ठूलो स्वरले हाँस्नुभएन कि उहाँको घाँटीको माथिल्लो भागमा झुण्डिएको मासु देखियोस्। उहाँ मुस्कुराउनु हुन्थ्यो।
अबू-सईद अल्-खुदरी (रजियल्लाहु अन्हु) ले बयान गरेका छन्, “नबी (सल्लल्लाहु अलैहि वसल्लम) पर्दाभित्र बस्ने कुमारी युवतीभन्दा पनि बढी लजालु हुनुहुन्थ्यो। उहाँले कुनै अप्रिय कुरा देख्नुहुन्थ्यो भने, त्यसको असर उहाँको मुहारमा स्पष्ट रूपमा झल्किन्थ्यो।”
मुत्तफकुन अलैहि
अबू-सईद अल्-खुदरी (रजियल्लाहु अन्हु) ले वर्णन गरेका छन्, नबी (सल्लल्लाहु अलैहि वसल्लम) पुरुषहरूसँग नमिसिएकी, आफ्नो घरमा पर्दामा बस्ने एक अविवाहित युवती भन्दा बढी लजालु हुनुहुन्थ्यो । उहाँको अत्यधिक लजालु स्वभावको एउटा उदाहरण यो थियो कि जब उहाँलाई कुनै कुरा अप्रिय लाग्थ्यो भने उहाँले मुखले केही भन्नुहुन्नथ्यो, तर उहाँको मुहारको रङ र अवस्था परिवर्तन भइहाल्थ्यो। सहाबाहरू (रजियल्लाहु अन्हुम) उहाँको अनुहार हेरेरै बुझिहाल्थे कि यो कुरा उहाँलाई मन परेन।
अब्दुल्लाह बिन मालिक बिन बुहैना (रजियल्लाहु अन्हु) ले बयान गरेका छन् कि रसूल (सल्लल्लाहु अलैहि वसल्लम) जब नमाज पढ्नुहुन्थ्यो, उहाँले (सज्दाको अवस्थामा) आफ्ना दुवै हात (भुइँमा राख्दा) यति फराकिलो पार्नुहुन्थ्यो कि उहाँको काखको सेतोपन देखिन्थ्यो।
मुत्तफकुन अलैहि
नबी (सल्लल्लाहु अलैहि वसल्लम) सज्दा गर्दा आफ्ना दुवै हातबीच फराकिलो दूरी राख्नुहुन्थ्यो, प्रत्येक हातलाई पखेटा फैलाएजस्तै गरेर आफ्नो काखीसँगैको तलको शरीरको भागबाट यति टाढा राख्नुहुन्थ्यो कि उहाँको काखीको छालाको रङ देखिन्थ्यो। यसले दुवै हातलाई त्यसरी फैलाउने र तिनीहरूलाई शरीरको छेउबाट टाढा राख्ने कार्यको अतिशयोक्तिलाई जनाउँछ।
अबू-हुरैरह (रजियल्लाहु अन्हु) ले बयान गरेका छन्, रसूल (सल्लल्लाहु अलैहि वसल्लम) ले भन्नुभएको छ: "यदि मलाई मेरो उम्मत कठिनाइमा पर्ने डर नभएको भए, म तिनीहरूलाई प्रत्येक नमाजको समयमा मिस्वाक (दाँत सफा) गर्न आदेश दिने थिएँ।"
मुत्तफकुन अलैहि
रसूल (सल्लल्लाहु अलैहि वसल्लम) ले भन्नुभयो कि यदि उहाँलाई आफ्नो उम्मत कठिनाइमा पर्ने डर नभएको भए, उहाँले प्रत्येक नमाजको समयमा मिस्वाक गर्न अनिवार्य गर्नुहुन्थ्यो।
आस्थावानहरूकि आमा आइशा (रजियल्लाहु अन्हा) ले बयान गरेकि छिन्, म र नबी (सल्लल्लाहु अलैहि वसल्लम) एउटै भाँडोबाट नुहाउने गर्दथ्यौं, जबकि हामीदुवै जुन्बी (अपवित्र) हुन्थ्यौं । त्यसैगरी म महिनावारी भएको बेला नबी (सल्लल्लाहु अलैहि वसल्लम) को आदेश अनुसार आफ्नो गुप्ताङ्ग लुगाले बाँध्थेँ र त्यसपछि उहाँ मसँग मुबाशरत (सम्भोग बाहेक अन्य यौन क्रियाकलापहरू) गर्नुहुन्थ्यो । त्यसैगरी उहाँ इतिकाफ (मस्जिदमा इबादतको लागि एकान्त बास बस्नु) मा हुँदा आफ्नो शिर मतिर (मस्जिदबाट) बाहिर निकाल्नुहुन्थ्यो र म महिनावारी हुँदा पनि उहाँको शिर धुने गर्थे ।
मुत्तफकुन अलैहि
उम्मुल मोमिनीन आइशा (रज़ियल्लाहु अन्हा) ले रसूल (सल्लल्लाहु अलैहि वसल्लम) सँगका आफ्ना केही विशेष व्यक्तिगत अवस्थाहरू बारे बताउनुभएको छ। तीमध्ये एउटा यो हो कि सम्भोग पछि पवित्र हुनलाई उहाँ दुवै जना सगँ संगै एउटै भाँडोबाट पानी लिएर नुहाउने गर्थे । त्यसैगरी, जब उनी महिनावारीमा हुन्थिन्, नबी (सल्लल्लाहु अलैहि वसल्लम) ले उनीसँग माया गर्न खोज्दा उनको शरीरलाई नाभिदेखि घुँडासम्म छोप्न आदेश दिनुहुन्थ्यो र सम्भोग बाहेक अन्य यौन क्रियाकलापहरू गर्नुहुन्थ्यो । त्यसैगरी उहाँ मस्जिदमा इतिकाफमा हुँदा आफ्नो शिर आइशा (रजियल्लाहु अन्हा) तिर बाहिर निकाल्नुहुन्थ्यो र उनी आफ्नो घरमा महिनावारी भएको बेला उहाँको शिरलाई धुने गर्थिन् ।
अबू हुरैरह (रजियल्लाहु अन्हु) ले वर्णन गरेका छन्, अल्लाहका रसूल (सल्लल्लाहु अलैहि वसल्लम) ले भन्नुभयो: "जब कुनै मुस्लिमले मलाई सलाम पठाउँछ, अल्लाहले मेरो आत्मा मलाई फर्काइदिनुहुन्छ, ताकि म उसको सलामको जवाफ दिन सकूँ।"
अबू दाउद र अहमदले वर्णन गरेका छन्
नबी (सल्लल्लाहु अलैहि वसल्लम) ले हामीलाई भनिरहनुभएको छ, उहाँको आत्मा उहाँको शरीरमा फर्काइन्छ, ताकि उहाँले सलाम गर्ने व्यक्तिलाई जवाफ दिन सकून्, चाहे तिनीहरू टाढा होस् वा नजिक। याद राख्नुहोस्, बरजखको जीवन र चिहान अदृश्य संसारसँग सम्बन्धित छन्, जसको वास्तविकता अल्लाह बाहेक अरू कसैलाई थाहा छैन, उहाँ सबै कुराको लागि सक्षम हुनुहुन्छ।
अबू हाजिमले भन्नुहुन्छ: "मैले अबू हुरैराह (रदियल्लाहु अन्हु) सँग पाँच वर्ष बिताएँ। मैले उहाँलाई अल्लाहका नबी (सल्लल्लाहु अलैहि वसल्लम) बाट हदीस वर्णन गर्दै गरेको सुनें, उहाँले भन्नुभयो: "बनी इस्राईलको राजनीतिक तथा सामाजिक नेतृत्व स्वयम् नबीहरूले गर्दथे। जब कुनै नबीको मृत्यु हुन्थ्यो, तब अर्का नबीले उनको स्थान लिन्थे। तर, म पश्चात् कोही पनि नयाँ नबी आउने छैनन्; बरु अब खलिफाहरू (उत्तराधिकारीहरू) हुनेछन् र उनीहरूको सङ्ख्या धेरै हुनेछ।" सहाबाहरूले सोधे: "हे अल्लाहका रसूल (सल्लल्लाहु अलैहि वसल्लम)! तसर्थ, हजुर हामीलाई त्यस अवस्थाका लागि के आदेश दिनुहुन्छ?" उहाँ (सल्लल्लाहु अलैहि वसल्लम) ले भन्नुभयो: "तिमीहरू जसको 'बैअत' (वफादारिताको शपथ) सबैभन्दा पहिले भएको छ, त्यसैप्रति आफ्नो कर्तव्य पूरा गर्नू। उनीहरूलाई उनीहरूको हक-अधिकार प्रदान गर्नू; किनकि अल्लाहले उनीहरूलाई सुम्पिनुभएको जनताप्रतिको दायित्वको विषयमा उनीहरूसँग अवश्य नै सोधपुछ गर्नुहुनेछ।"
मुत्तफकुन अलैहि
नबी (सल्लल्लाहु अलैहि वसल्लम) ले जानकारी दिनुभयो कि बनी इस्राईलको नेतृत्व र शासन उनीहरूका सन्देशवाहकहरूले गर्दथे, र उनीहरूको मामिलाको रेखदेख त्यसरी नै गर्दथे जसरी राजा वा शासकहरूले आफ्ना प्रजाको गर्दछन्। जब-जब उनीहरूमा कुनै विकृति वा खराबी देखा पर्दथ्यो, अल्लाहले उनीहरूका लागि एक नबी पठाउनुहुन्थ्यो, जसले उनीहरूको व्यवस्थालाई सुधार्नुहुन्थ्यो र उनीहरूले धर्मका नियमहरूमा गरेका परिवर्तन वा विकृतिहरूलाई हटाउनुहुन्थ्यो। तर निश्चय नै मपछि कुनै नबी आउने छैनन् जसले उनीहरूले गरे जस्तै कार्य गरुन्; बरु म पछि खलिफाहरू (उत्तराधिकारीहरू) हुनेछन् र उनीहरूको सङ्ख्या धेरै हुनेछ, जसका कारण उनीहरूका बीचमा मतभेद र विवाद उत्पन्न हुनेछ। तब सहाबाहरूले नबी (सल्लल्लाहु अलैहि वसल्लम) लाई सोधे: यस्तो अवस्थामा तपाईं हामीलाई के गर्न आदेश दिनुहुन्छ? उहाँले जवाफ दिनुभयो: यदि एक खलीफा पश्चात् अर्को खलीफाप्रति बफादारिताको शपथ (बैअत) लिइन्छ भने; प्रथम खलीफाको शपथ वैध मानिन्छ जसको निर्वाह गर्नु कर्तव्य हो, र दोस्रो शपथ अमान्य ठहरिन्छ र त्यसको लागि नेतृत्वको दाबी गर्नु वर्जित (हराम) छ। तिनीहरूलाई उनीहरूको अधिकार प्रदान गर्नु, र अवज्ञा वा पापका कार्यहरू बाहेक अन्य समस्त विषयहरूमा आज्ञाकारिताका साथ तिनीहरूको अनुसरण गर्नु। निश्चय नै, अल्लाहले उनीहरूलाई तिमीहरूप्रति गरेका कार्यहरूको सोधपुछ र हिसाब लिनुहुनेछ।
अनस (रजियल्लाहु अन्हु) ले बयान गरेका छन्, "नबी (सल्लल्लाहु अलैहि वसल्लम) का केही सहाबाहरूले उहाँका श्रीमतीहरूसँग उहाँको गोप्य (एकान्तको) उपासनाको बारेमा सोधे। (उत्तर सुनेर) उनीहरूमध्ये एकजनाले भने: 'म विवाह नै गर्दिन।' अर्काले भने: 'म मासु खान छोडिदिन्छु।' र अर्को एकजनाले भने: 'म कहिल्यै ओछ्यानमा सुत्दिन।' (जब यो कुरा नबी (सल्लल्लाहु अलैहि वसल्लम) लाई थाहा भयो), उहाँले अल्लाहको प्रशंसा गर्नुभयो र भन्नुभयो: 'ती मानिसहरूलाई के भएको हो, जसले यस्तो र त्यस्तो कुरा गर्न थालेका छन्? म त राति नमाज पनि पढ्छु र सुत्छु पनि; म उपवास पनि बस्छु र कहिलेकाहीँ बस्दिन पनि; र म महिलाहरूसँग विवाह पनि गर्छु। तसर्थ, जो मेरो सुन्नत (तरिका) बाट विमुख हुन्छ, ऊ मबाट (मेरो अनुयायी) होइन।'"
मुत्तफकुन अलैहि
केही सहाबीहरू नबी (सल्लल्लाहु अलैहि वसल्लम) का श्रीमतीहरूको घरमा आए। तिनीहरूको उद्देश्य नबी (सल्लल्लाहु अलैहि वसल्लम) ले घरभित्र कसरी उपासना गर्नुहुन्छ भनी जान्नु थियो। जब उनीहरूलाई उहाँको उपासनाको बारेमा बताइयो, मानौँ तिनीहरूले यसलाई कम ठाने र भने: "कहाँ रसूल (सल्लल्लाहु अलैहि वसल्लम) को उच्च स्थान, र कहाँ हाम्रो अवस्था ? उहाँका अघिल्ला र पछिल्ला सबै क्षमा गरिएका छन्। तर हाम्रो अवस्था त्यस्तो होइन; हामीलाई क्षमा प्राप्त हुनेछ कि हुनेछैन भन्ने कुरा निश्चित छैन। त्यसैले, हामीले अल्लाहको क्षमा प्राप्तिको आशामा अधिकाधिक उपासना र सत्कर्ममा प्रयासरत रहनुपर्छ।" त्यसपछि, तिनीहरूमध्ये एकले भन्यो, "म विवाह नै गर्दिन। अर्कोले भन्यो, "म त अब मासु खानै छोडिदिन्छु।" कसैले भन्यो, "म त ओछ्यानमा सुत्ने नै छैन।" जब नबी (सल्लल्लाहु अलैहि वसल्लम) लाई यो कुरा थाहा भयो, उहाँले आफ्नो असन्तुष्टि व्यक्त गर्नुभयो। उहाँले मानिसहरूलाई सम्बोधन गर्नुभयो र अल्लाहको प्रशंसा गर्दै भन्नुभयो: "मानिसहरूलाई के भएको छ, जसले यस्ता कुराहरू गरिरहेका छन्?! अल्लाहको कसम! म तिमीहरू सबैभन्दा बढी अल्लाहको भय राख्ने र सबैभन्दा निष्ठावान् धर्मी व्यक्ति हुँ; तर यसका बाबजुद म राति सुत्दछु पनि, ताकि पूर्ण उर्जाका साथ तहज्जुद (रात्रि नमाज) को नमाज पढ्न सकूँ। म भोजन पनि गर्दछु ताकि व्रत बस्न बल मिलोस्, र म महिलाहरूसँग विवाह पनि गर्दछु। तसर्थ, जसले मेरो सत्मार्ग (सुन्नत) बाट विमुख हुन्छ वा अर्को मार्गलाई उत्तम ठानी त्यसको अनुशरण गर्दछ, ऊ मबाट (मेरो अनुयायी) होइन।"
