Hadeeth Cards

Da'wa cards that highlight great meanings from the noble prophetic hadiths in a simple style and attractive display that helps the Muslim to have a deeper understanding of his religion in an easy way

About Hedayat Browse Cards

All

Yii a Gεεbr nengẽ, Wẽnd yard be a yĩnga: Tɩ raoa n sok Wẽnd Tẽn-tʋʋma, Wẽnd pʋʋsg la A tɩlgr be a yĩnga, n yeele : kõ maam kibare, rẽ yĩnga mam sã n pʋʋs wakat-rãmb a nu wã, la m loe Ramadaanã, la m maan halaalã, la m bas haraamã, la m ka paas baa fʋɩ woto zugu, rẽnd yĩnga m na kẽ arzãnã? T’a yeele : « n-ge », tɩ raoã yeele : m wẽen ne Wẽnde, m ka nan paas baa fʋɩ wãndã zug ye.

Muslim

Nabiyaamã, Wẽnd pʋʋsg la A tɩlgr be a yĩnga, vẽnegdame n wiligdẽ, tɩ ned ning sẽn pʋʋsa wakat a nu wã sẽn yaa farilã, n ka tol m paas baa fɩ sẽn yi naafɩl-rambẽ wã, la a leb n loe Ramadaanã, n ka tol n loe naafɩla, la a loe a sũurẽ tɩ halaal yaa halaal la a tʋm-a, la a leb n loe a sũurẽ tɩ haraam yaa sẽn gɩdge, n zãag a meng ne-a, t’a soab kẽeda arzãna.

Yii a Abɩɩ Maalik Al-As-ariy nengẽ, Wẽnd yard be a yĩnga, a yeelame: Wẽnd Tẽn-tʋʋma, -Wẽnd pʋʋsg la A tɩlgr be a yĩnga- yeelame: « yɩlgrã a yaa lɩɩmaang pʋsʋka, la Alhamdʋ lillah, a pita tʋʋmã geelg laoko, la sʋbhaanallaah la Alhamdʋ lillaah, b yiibã pitame, maa a pita bũmb ning sẽn be saasã la tẽngã sʋka, la ad Pʋʋsgã yaa vẽenem, la sãra (doaag) maanego a yaa daliil sẽn wilgd lɩɩmaangã, la ad sugr yaa vẽenem, la Alkʋrãanã a yaa gom lubdga, sẽn na n sõng foom, maa sẽn na n nams foom, ad nebã fãa gilli, b sãta beoogo, n koosd a mengã, be beenẽ sẽn basd a yõor burkĩndi n yi Bugmã, be b pʋgẽ ned sẽn na n halk a yõorã n kẽes-a Bugmã pʋgẽ».

Muslim

Hadiis-kãngã pʋgẽ, Nabiyaamã, Wẽnd pʋʋsg la A tɩlgr be a yĩng kõta kibare, tɩ ad yɩlgr ningã sẽn yaa yɩng yɩlgrã, a yɩta ne koom yõgbo la koom soobo, la yẽnda me yaa sart Pʋʋsgã pʋgẽ. La a leb n wilgdẽ tɩ ned sẽn na n yeele: « Alhamdʋ lillah, a yaa bũmb sẽn pit a tʋʋm geelg laoko », yẽ me yaa fo sẽn na n pẽgd Wẽnde, A Naam yɩlgame, la f leb n sɩfd-A ne sɩf-rãmb sẽn pidi, b na n rɩka rẽnda n pees dũni yikr raare, t’a pid tʋʋma laoko. La a leb n wilgdẽ tɩ : « sʋbhaanallaah la Alhamdu lillaah » yeelgo, yẽ me yaa fo sẽn na n yɩlg Naab A Wẽnde, n yi boogr fãa gilli, la f leb n sɩf-A ne sɩfg sẽn pidi, sẽn sõmb ne-A -A Naam yɩ wagelle- n lagem ne A nonglem, la A zɩsgre, yel-kãensã yaa bũmb sẽn piti, sẽn be saasã la tẽngã sʋka. A leb wilgdame tɩ ad : « Pʋʋsgã » yaa vẽenem, a yaa nuura ne yamba, a sũurẽ wã, la a nengẽ wã, la a yaoogẽ wã, la Yikrã raare. N leb n wilgdẽ tɩ doaag maanego, a yaa daliil sẽn wĩnigd muumin lɩɩmaangã sɩda, lɑ a sẽn weleg ne munaafɩkã, sẽn gɩdgdb n ka rat n na n yãk Zakã, n ka sɩdgd a pʋlengã. A leb n wildgame tɩ « sugr » yaa vẽenem, la yẽ me yaa Adam Biig tõog a meng n yi gẽega, la zabre, yaa bũmb sẽn yaa nuura, tɩ tʋʋlem la yõogre, n be yel-kãnga pʋgẽ, t’a yaa wala wĩndtoogã vẽenem, a yaa bũmb sẽn yaa toog ne yõore, n leb n dɑt tɩ fo tõog n wõr yõorã, la f leb n gɩdg yõorã n yi a yamleoogã, rẽnd a soabã ka bakd n be kãndgr pʋgẽ wakat fãa, n be sɩd zugu, la yẽndã me yaa f maan sugri ne Wẽnd tũudmã, la f leb n maan sugri n bas A kɩɩsgã, la f maan sugri ne yεl nins sẽn paam foom, la yel tood gill sẽn paam foom dũni wã pʋgẽ, tɩ f maan sugri. Rẽnd wilgdame tɩ Alkʋrãanã a yaa gom lubdga, ne foom tɩ f sã n karem-a, la f tʋm ne-a, n leb n yaa gom lubdga, n na n nams foom tɩ fo sã n bas-a n ka tʋm ne-a la f ka karemd-a. Rẽ poorẽ tɩ Wẽnd pʋʋsg la A tɩlgr be a yĩng kõ kibare, tɩ ad nebã fãa gilli, b yitame ned fãa yãgddẽ, lɑ b sẽegdẽ, n yikd b gõeemẽ wã, n yit b zagsẽ wã, n na n tʋg n maan b tʋʋmã kõbg toor-toore, Rẽnd be b pʋgẽ, ned ning sẽn na n tẽeg tɩrga, a tũudmã zugu, tɩ bas a yõorã burkĩndi n yi Bugmẽ wã, la be b pʋgẽ ned ning sẽn na n kɩlle, n bas so-tɩrga n kẽ Wẽnd kɩɩsg pʋgẽ, n halk a yõorã, ne a sẽn na n kẽes-a Bugmã.

Yii a Mu’aaz nengẽ, Wẽnd yard be a yĩnga, a yeelame: Mam rag n zao Nabiyaamã poorẽ, Wẽnd pʋʋsg la A tɩlgr be a yĩnga, bõang zug, b sẽn boon tɩ Ʋfayr, tɩ Nabiyaamã yeele : « Mu’aaze ! Rẽ yĩnga fo mii Wẽnd hakε wã sẽn zao A yembsã zugu, la yembsã hakε sẽn zao Wẽnd zug bɩɩ » ? Tɩ mam yeele : « Wẽnd la A Tẽn-tʋʋmã, n mi rẽnda ». t’a yeele : « bɩ f bãnge tɩ Wẽnd hakε wã, yaa b tũ Wẽnde la b ra maan lagem-n-taar ne-A ye, la yembsã hakε sẽn zao Wẽnde, yaa A ra wa tʋg n nams ned sẽn ka maan lagem-n-taar ne-A baa fʋɩ ye » Tɩ mam yeele : « rẽ yĩnga, m ka na n noog nebã sũur ne rẽ » ? Tɩ Nabiyaamã yeele : « ra kõ-b ra noog-b sũur ne rẽ, tɩ b wat n teega rẽnda n bas tʋʋmã ».

Al-Bukhari and Muslim line

Nabiyaamã, Wẽnd pʋʋsg la A tɩlgr be a yĩnga, vẽnegdame n wilgdẽ, Wẽnd hakε wã sẽn be yembsã zugu, la yembsã hakε sẽn be Wẽnd zugu, n wilgdẽ tɩ ad Wẽnd hakε wã sẽn be yembsã zugu, yaa b tũ-A A Yembr tãa, n ka maan lagem-n-taar ne-A Baa fʋɩ ye, La tɩ ad yembsã hakε sẽn zao Wẽnde, yaa A ra wa tʋg n sɩbg neb nins sẽn yaa Wẽn-yembdbã, sẽn ka maand-b lagem-n-taar ne-A wã. Rẽ poorẽ, a Mu’aaz yeelame : « Wẽnd Tẽn-tʋʋma, rẽ yĩnga, m ka na n kõ nebã kiba-noogo, sẽn na yɩlẽ tɩ b kɩdme la b noog b sũur ne Wẽnd kũun-kãnga » ? Tɩ Nabiyaamã -Wẽnd pʋʋsg la A tɩlgr be a yĩnga- gɩdge, a sẽn yεεsd tɩ b na n wa teeg rẽndã.

Yii a Gεεbr nengẽ, Wẽnd yard be a yĩnga, a yeelame: Raoa n wa Nabiyaamã nengẽ, Wẽnd pʋʋsg la A tɩlgr be a yĩnga, n yeele : Tẽn-tʋʋmã, waagib-rãmb a yiibã yaa bõe ? Tɩ Nabiyaam yeele : « yaa ned ning sẽn maan kaalem n ka maan lagem-n-taar ne Wẽnd baa fʋɩ, yaa tɩlae t’a kẽ arzãnã, la ned ninga sẽn maan kaalem t’a yaa sẽn maan lagem-n-taar ne Wẽnde, ne bũmbu, a kẽeda Bugumã».

Muslim

Raoa n sok Nabiyaamã, Wẽnd pʋʋsg la A tɩlgr be a yĩnga, yell sõmbs a yiibã, sẽn maan tɩ ned kẽ arzãnã, la sẽn maan tɩ ned kẽ Bugmã ? T’a loek-a, Wẽnd pʋʋsg la A tɩlgr be a yĩnga, tɩ yell ninga sẽn kẽesd a soaba arzãnã tɩlae wã, yaa ninsaal sẽn na n maan kaalem, t’a yaa sẽn tũud Wẽnde, A Yembre, n ka maan lagem-n-taar ne-A baa fʋɩ ye, la ad yell ninga sẽn maan tɩlae n kẽes a soab Bugmẽ wã, yaa ninsaal sẽn na n ki t’a yaa sẽn maan lagem-n-taar ne Wẽnde, n maand gees-n-taaga la bils-n-taare ne Wẽnde, A tũudmã wεεngẽ, la A Wẽndlmã wεεngẽ, maa yaa A yʋɩyã wεεngẽ, maa yaa A sɩf-rãmbã wεεngẽ.

Yii a Abdʋllaah ɭbn Amr ɭbn Aass nengẽ -Wẽnd yard be b yiibã yĩnga- a yeelame: Wẽnd Tẽn-tʋʋma, Wẽnd pʋʋsg la A tɩlgr be a yĩnga, yeelame : « Ad Wẽnd na n yiisa ned mam poorẽ rãmbẽ wã, bõn-naandsã taoore, yikrã raarã, n yεdg a tʋʋm sεb pis-wae la a wae, sebr fãa gilli, a yaa nif gesg tεkẽ, rẽ poorẽ tɩ Wẽnd yeel-a : fo kɩɩsda bũmb tʋʋm-kãensã pʋgẽ baa fʋɩ bɩɩ ? Rẽ yĩnga Ma malεgs nins sẽn yaa gũusdbã, n yaa gʋlsdbã b wẽga foom bɩɩ ? T’a yeele : « ayoo ! M Soaba Wẽnde » tɩ Wẽnd yeel-a : « rẽ yĩnga fo tara padang bɩɩ ? » T’a yeele : « ayoo ! M Soaba Wẽnde » Tɩ Wẽnd yeel-a « ad fo tara tʋʋm sõng Tõnd nengẽ, ad wẽgb ka be fo zug rũnda ye » tɩ b yiis seb bila tɩ gʋlsa a pʋgẽ, Ashadu Anlaa’ilaa illallah, wa ashadu anna Muhammadan abduhuu wa Rasuuluhuu (m maan kaset tɩ soab sẽn na n tũ n tɩlg ka be rẽnda Wẽnde, m leb n maana kaset t’a Mohammad yaa Wẽnd yamba n leb n yaa A Tẽn-tʋʋma) tɩ Wẽnd yeele : « wa ne fo tʋʋma » tɩ nedã yeele : « seb-kãngã na n maana bõe ne seb-kãensã fãa gilli ? » Tɩ Wẽnd yeel-a : « ad foom, b ka na n vẽg-f ye » [Nabiyaamã yeelame] tɩ b rɩk tʋʋm wẽnsã sebrã n ning kɩreng a yembre, la b rɩk sebrã n ning kɩreng a to wã, tɩ sebrã sẽn ningẽ wã zɩsge, tɩ sebã sẽege, rẽnd bũmb baa fʋɩ ka be sẽn na n zɩsg n naag Wẽnd yʋʋrã ye ».

At-Tirmidhi line

Nabiyaamã, Wẽnd pʋʋsg la A tɩlgr be a yĩnga, kõo kibar hadiisã pʋgẽ, tɩ Wẽnd na n yãka neda A yembsã sʋka, yikr raarã, n bool-a n na n geel a tʋʋmã, rẽnd b na n paεεla sεb pis-wae la a wae, sẽn yaa yẽ tʋʋm wẽnsã sεbã, yẽ sẽn da maan tʋʋm ning dũni wã, sebr fãa woglem a yaa wala nifr gesg tεkẽ, Rẽ poorẽ tɩ Wẽnde, A Naam yɩ wagell n zẽke, yeel-a : fo kɩɩsda bũmb tʋʋm-kãensã pʋgẽ baa fʋɩ bɩ ? Rẽ yĩnga Mam malεgs nins sẽn yaa gũusdbã, n yaa gʋlsdbã b wẽga foom bɩ ? T’a yeele : « ayoo ! M Soaba Wẽnde » tɩ Wẽnde, yeel-a -A naam yɩ agelle-: rẽ yĩnga fo tara padanga, tɩ fo na n padame ne bũmb ning fo sẽn maan tʋʋm ning dũni wã pʋgẽ wã? Tõe tɩ f yĩmame, maa f tudgame, maa yaa zɩɩlem, Tɩ neda yeele, ayoo ! M Soaba Wẽnde, mam ka tar padang ye. Tɩ Wẽnd yeele, A Naam yɩ wagell n zẽke: « ad fo tara Tõnd nengẽ tʋʋm sõngo, b ka na n wẽg foom rũnda ye. Nabiyaamã yeelame : « tɩ b yiis seb bila tɩ gʋlsa a pʋgẽ Ashadu Anlaa’ilaa illallah, wa ashadu anna Muhammadan abduhuu wa Rasʋʋluhuu (m maan kaset tɩ soab sẽn na n tũ n tɩlg ka be rẽnda Wẽnde, m leb n maana kaset t’a Mohammad yaa Wẽnd yamba, n leb n yaa A Tẽn-tʋʋma. tɩ Wẽnd yeele, A Naam yɩ wagell n zẽke : « wa ne fo tʋʋma » tɩ nedã yeele, n maand yel-solemde : «m Soaba Wẽnde ! Seb-kãngã na n maana bõe ne seb-kãensã fãa gilli?! Tɩ Wẽnd yeel-a : « ad foom, b ka na n wẽg-f lae » [ Nabiyaama yeelame]: tɩ b rɩk tʋʋm wẽnsã sebrã n ning kɩreng a yembre, la b rɩk sebrã n ning kɩreng a to, tɩ tʋʋm wẽnsã sẽn be zĩig ningã lebg faaga, n zẽk yĩngri, tɩ sebrã sẽn ningẽ wã zɩsge, tɩ Wẽnd yaaf neda.

Yii a Abɩɩ Hurayra nengẽ, Wẽnd yard be a yĩnga, tɩ yii Wẽnd Tẽn-tʋʋm nengẽ, Wẽnd pʋʋsg la A tɩlgr be a yĩnga : a yeelame : «wakat ning Wẽn d sẽn wa n naan arzãnã la Bugmã, A tʋmsa a Gibriila, tɩlgr be a yĩnga, arzãnẽ wã, n yeel-a : « ges-a la f ges bũmb ning Mam sẽn sεgl a pʋgẽ wã, n na n kõ nebã ». T’a Gibriil ges-a n lebg wa yeele : m wẽen ne Fo zɩslemã, ned ka be, n na n wʋm yãwã kibare, rẽndame t’a kẽ-a. Tɩ Wẽnd sagl tɩ b gũbg arzãnã ne yεl nins yõor sẽn kisã. La A yeel-a « ges-a la bũmb ning Mam sẽn sεgl tɩ be a pʋgẽ wã, n na n kõ nebã» . T’a lebg n tɩ ges-a, n mik tɩ b gilg-a lame ne yεl nins yõor sẽn kisi. T’a Gibriil yeele: “ m wẽen ne Fo zɩslemã, m yεεsdame tɩ ned baa a yembr kõn n kẽ-a ye” T’a yeele: kẽng n tɩ ges Bugmã la f ges bũmb ning Mam sẽn sεgl a pʋgẽ, n na n bĩng a nebã. T’a tʋg n ges-a, n mik tɩ Bugmã zombda taaba, t’a lebg n wa n yeel Wẽnde: “ m wẽen ne Fo zɩslemã ned baa a yembr kõn n kẽ yãwã ye”. Tɩ Wẽnd sagl tɩ b gilg Bugmã ne yõor yamleoog teedo, tɩ Wẽnd yeel-a: “lebg n tɩ ges-a”. T’a Gibriil tʋg n ges-a, n mik t’a yaa sẽn gũbg ne yõyã yamleoodo, t’a lebg n wa yeele: “ m wẽen ne Fo zɩslemã, ad mam yεεsdame tɩ ned baa a yembr ka na n põse, n ka kẽ Bugmã ye».

Abu Dawood line

Nabiyaamã kõo kibare, Wẽnd pʋʋsg la A tɩlgr be a yĩnga: tɩ Wẽnde, A sẽn wa n naan arzãnã la Bugmã, A yeela a Gibriila, tɩlgr be a yĩnga : « kẽng arzãnẽ wã, n tʋg n ges-a ». T’a Gibriil kẽnge n tʋg n ges arzãnã, rẽ poorẽ t’a legb n wa, T’a Gibriil yeele : “m Soab a Wẽnde! M wẽen ne Fo zɩslemã, ad ned ka wʋmd arzãnã kibare la bũmb ning sẽn be a pʋgẽ, sẽn yaa neema-rãmbã, la waoogrã, la yel-sõmã, rẽndame t’a nong n rat n na n kẽ-a, la a tʋm sẽn na kẽes-a beenẽ”. La rẽ poorẽ, Wẽnd gũbga arzãnã ne yõor sẽn kis yεl ninsã, la yεl toodã, sẽn yaa Wẽnd sẽn sagl tɩ b maan tʋʋm ninsã, la b zãag yεl ninsã, rẽnd ned ning sẽn tʋlla arzãnã kõom, bɩ a modg n gãndag yεl-kãensã, yõorã sẽn ka nongã. Rẽ poorẽ, tɩ Wẽnd yeele, A Naam yɩ wagell n zẽke: Gibriila! Kẽng n tɩ ges arzãnã, lɑ rẽ yaa A sẽn gũbg-a ne yõor sẽn kisã poorẽ, T’a Gibriil kẽng n tɩ ges-a, rẽ loogr poorẽ t’a lebg n yeele: “ M Soab A Wẽnde ! M wẽen ne Fo zɩslemã, ad mam yεεsdame tɩ ned baa a yembr ka na n kẽ arzãnã, yel-kegmes nins sẽn be arzãnã kõom sorã zug yinga. La wakat ning Wẽnd sẽn wa n naan Bugmã, A yeelame: “Gibriila! Kẽng n tʋg n ges-a” t’a Gibriil kẽng n tɩ ges Bugmã, Rẽ poorẽ, a Gibriil lebgame n wa yeele : « m Soab a Wẽnde! M wẽen ne Fo zɩslemã, ned ka be n na n wʋm Bugmã la bũmb ning sẽn be a pʋgẽ, sẽn yaa nangã, la keelemã la sɩbgrã, rẽndame t’a kisg Bugmã kõom, la a zoe n zãag sabab-rãmb nins sẽn na n kẽes-a beenẽ wã. Rẽ loogr poorẽ, Wẽnde, A Naam yɩ wagell n zẽke, A gũbga Bugmã la A maan sor ninga sẽn na n tũ n kẽng Bugmẽ wã tɩ yaa yõor yamleoogo, la wʋm-noodo, rẽ poorẽ t’A yeel a Gibriila : kẽng n tʋg n ges-a, t’a Gibriil kẽng n tɩ ges-a, rẽ poorẽ t’a lebg n wa yeele: “ m Soab A Wẽnde ! M wẽen ne Fo zɩslemã, ad mam yεεsdame la paka maam tɩ ned baa a yembr ka na n põse, n ka kẽ Bugmã ye, ne bũmb ning sẽn gũbg Bugmã sẽn yaa yõor yamleoodã, la wʋm-noodã”.

Yii a Abdullaah ɭbn Amr ɭbn Al-Ass nengẽ, Wẽnd yard be b yiibã yĩnga, a yeelame: m wʋma Wẽnd Tẽn-tʋʋma, Wẽnd pʋʋsg la A tɩlgr be a yĩnga t’a yetẽ : «Wẽnd gʋlsa bõn-naandsã pʋlenga, taoor t’A na n ka naan saasã la tẽngã, yʋʋm tus pis-nu, a yeelame : « la Wẽnd Gueela ra bee koomã yĩngri ».

Muslim

Nabiyaamã, Wẽnd pʋʋsg la A tɩlgr be a yĩnga, kõta kibare, tɩ Wẽnd gʋlsa bũmb ning sẽn na n yɩ, sẽn yaa yembsã pʋlense, n wels-b fãa gilli, sẽn yaa vɩɩm, la kũum, la rɩtla, la zẽng sẽn ka yɩ rẽnda, Lawhulmahfuuzã (Walg ning b sẽn gũ wã) pʋgẽ, taoor t’A na n ka naan saasã la tẽngã, ne yʋʋm tus pis-nu, tɩ yẽnda me yaa bũmb sẽn na n wa yɩ n zems ne wala Wẽnd sẽn da bʋ-a wã, A Naam yɩ wagell n zẽke, Rẽnd bũmb fãa sẽn yɩte, yaa sẽn tũ ne Wẽnd Bʋʋdo la A pʋlenga, Rẽnd bũmb ning sẽn paam yamba, a ka yɩ n rag na n yõsg-a ye, la bũmb ning me sẽn yõsg-a wã, ka yɩ n da na n paam-a ye.

Yii a Abɩɩ Hʋrayrat nengẽ, -Wẽnd na maan-a yardo-, a yeelɑme mɑm wʋmɑ Nɑbiyɑɑã -Wẽnd pʋʋsg la A tɩlgr be a yĩng- t'ɑ yetẽ: «Ned ning sẽn wa n kẽng hagiimdu, n ka maan kẽed-n-taare, n ka maan dĩin-yiib tʋʋma, a yita a zunuubã pʋgẽ, n lebg wala a ma wã sẽn rog-a raar ningã».

Al-Bukhari and Muslim line

Nɑbiyɑɑmã -Wqend pʋʋsg lɑ A tɩlgr be ɑ yĩngɑ- ɑ vẽnegdɑme n wilgdẽ tɩ ned ning sẽn mɑɑnɑ hɑgiimdu Wẽnd yĩngɑ n pɑ mɑɑn kẽed-n-tɑɑr ye, lɑ kẽed-n-tɑɑrã yɑɑ rẽ lɑ ɑ yel-sɩngdsã wɑlɑ mogsgã lɑ sɑɑgrã, ɑ leb n kẽedɑ goɑm beedã, lɑ ɑ pɑ mɑɑn dĩin-yiib tʋʋmã ne Wẽnd kɩɩsgo lɑ tʋʋm wẽnɑ. Lɑ sẽn be dĩin-yiibã tʋʋmã pʋgẽ yɑɑ Hɑgiimdã sẽn gɩdg yεl ninsã mɑɑnego, ɑ sã n mɑɑn woto, ɑ lebgdɑ hɑgiimdẽ wã t'ɑ zunuubã yɑɑ sẽn yɑɑfe, tɩ yɑɑ wɑlɑ biig sẽn dogde t'ɑ yɑɑ sẽn yɩlg n yi zunuub buud fãɑ.

Yii a Aaɩsa nengẽ -Wẽnd yard be a yĩnga- a yeelame: tɩ Wẽnd Tẽn-tʋʋmã yeelame -Wẽnd pʋʋsg la A tɩlgr be a yĩnga-: Rɑ-wãbdgã yaɑ yɩlgr ne noorã, n yɑɑ yɑrdɑ ne Soɑbã».

An-Nasaa’i line

Nɑbiyɑɑmã -Wẽnd pʋʋsg lɑ A tɩlgr be ɑ yĩngɑ- kõtɑ kibɑre tɩ yẽnã yɩlgr ne (Arɑɑk) tɩɩgã rɑ-wãbdgã lɑ sẽn wõnd rẽ, ɑ yɩlgdɑ noorã n yi rẽgd-rãmbã lɑ yũ-yoodã, lɑ ɑ be sɑbɑb-rãmb nins sẽn mɑɑnd tɩ Wẽnd yɑr A yɑmbã; bɑlɑ Wẽnd ne A Tẽn-tʋʋmã tũudum n be beenẽ, n leb n yɑɑ Wẽnd sɑgellã sɑkre, n leb n pɑɑs sẽn be ɑ pʋgẽ sẽn yɑɑ yɩlgre Wẽnd ne A tẽn-tʋʋmã sẽn nongã A nɑɑm zẽkame.